Camiñando cara atrás
Maio 11, 2008 — Alberto ArmadaIsto é o que fai a nosa administración educativa. A súa falta de interese e/ou compromiso pola incorporación das TIC ao ensino no noso país non dotando de medios materiais (ordenadores, etc.) ás nosas aulas e non potenciando a formación do profesorado está a producir un estancamento educativo de consecuencias imprevisibles para o futuro da nosa sociedade. E como non imos cara adiante, estamos a retroceder posiblemente un lustro cada ano que pasa nestas condicións de precariedade de medios e de falta de innovación. O meu amigo César Salgado vén de deixarme un comentario que reproduzo nesta entrada:
Falan da cuestión “computadoras na aula versus aula de computadoras” nesta páxina colombiana:
http://www.eduteka.org/TemaRecursos1.php
E a miña resposta a ese comentario:
Efectivamente, César. Xa hai tempo que me decatei de que non fai falla ir a Finlandia para observar boas reflexións sobre a nova educación apoiada na TIC e integradora das TIC. En Colombia, México, etc. están a promover a incorporación das TIC ao ensino con moito interese. O que pasa é que Galicia ten unha das administracións educativas máis proclives ao tradicionalismo e á falta de innovación. E sempre me pregunto se é que non se enteran ou miran para outro lado. Tamén pode haber unha autocomplacencia incomprensible. O futuro, por desgraza, vainos dar a razón aos que reclamamos medios e formación para incorporarmos as TIC nas aulas galegas sen máis demora.
