E se isto non mellora…

Se para o curso 2008/2009 non dispoño de horario suficiente para coordinar e dinamizar a incorporación das TIC neste centro, se non se incrementan moito as dotacións de medios informáticos para levar as TIC ás aulas deste centro, se o profesorado deste centro non dispón de formación e tempo suficiente para incorporar as TIC nas súas clases, este coordinador seguirá a traballar na medida do tempo que se lle asigne na coordinación.

O cal quere dicir que o traballo de coordinación deixará de facerse en horas extra, non existirá a posibilidade de manter este blog de coordinación, nin a web dinámica, nin o wiki, nin a recén aberta rede social.

O tempo que me veña ben dispoñer na miña casa dedicareino á web 2.0 noutros desempeños menos frustrantes.

Aula Virtual

Recollo esta nova para salientar unha vez máis os avances na incorporación das TIC ás aulas noutras Comunidades Autónomas.

Esta refírese a Asturias e neste enlace pódese ler completa.

Chámanme a atención os seguintes aspectos:

“En cuanto a Centros de uso Avanzado de las TIC, en la actualidad hay 180 centros con una dotación avanzada para el desarrollo de proyectos de integración de las TIC avanzados”.

“También cuentan con unos 300 coordinadores de nuevas tecnologías en los centros, con la función de apoyar al profesorado en la integración de las TIC y en la adquisición de las competencias básicas por el alumnado que marca la Unión Europea para el 2010″.

“El 80 por ciento de los centros públicos asturianos disponen de Coordinadores de Nuevas Tecnologías, que destinan 10 horas semanales de su horario docente a dinamizar las TIC en los centros educativos.  El consejero de Educación y Ciencia señaló que Asturias tiene profesorado “suficiente” para avanzar seriamente en el dominio por parte del alumnado de la competencia digital”.

Fronte a isto, como veño denunciando dende fai moito, en Galicia só temos 20 centros “piloto” (non é o caso do CPI de Cuntis), non hai practicamente coordinadoras/coordinadores TIC, e no meu caso fun nomeado coordinador TIC cunha asignación de 90 minutos semanais.

Está claro que non vivimos no mesmo mundo, que en Galicia o dereito fundamental á educación non inclúe a calidade educativa.

Por suposto, ao longo do curso 2007/2008 dediquei incontables horas na miña casa para autoformarme e abrir e xestionar blogs, wikis, web, redes sociais e todo aquilo que dun xeito virtual puidese posibilitar a formación e implicación do profesorado e alumnado do meu centro. Pero a tarefa saldou resultados practicamente nulos.

O centro necesita un coordinador TIC con asignación horaria suficiente dentro do espazo físico no que se desenvolve a actividade docente. O centro precisa de máis medios informáticos. O profesorado necesita formación e tempo para incorporar as TIC.

Se no curso 2008/2009 non se melloran estas condicións por parte da Consellería de Educación asistiremos a un novo capítulo de retraso formativo na nosa comunidade… E este coordinador non contará con posibilidades reais de dinamizar as TIC.

Daquela, empregarei o meu tempo en aplicar as técnicas do século pasado nas miñas clases, afastándome da pretensión de utilizar os meus coñecementos da web 2.0.

Sen o apoio e a implicación da administración educativa galega non existe a máis mínima posibilidade de que as TIC cheguen ás nosas aulas.

Queda menos dun mes para para coñecer a resposta…

Congreso Nacional Internet en el Aula (Ministro de Industria)

Pois agora resulta que o sr. Ministro de Industria coincide plenamente coas miñas reivindicacións, plantexadas unha e outra vez ao longo deste curso que vén de rematar. Esta é unha mostra máis de que as TIC están a chegar ás aulas dun xeito ineludible. Descoñezo se aquí en Galicia seguirán a mirar  moito tempo para outro lado. Moito me temo que seremos a última comunidade en incorporar as TIC nas aulas, e o profesorado galego terá que acelerar de súpeto a partires dun momento determinado por non estar a sintonizar durante estes anos coas esixencias da nova educación. Ben, algunhas profesoras e profesores de Galicia estamos preparados e seguiremos a prepararnos incesantemente a pesares de non contar  cos medios que posibiliten a incorporación das TIC nas nosas clases. Somos unha minoría descoñecida pola maioría. Incluso non nos miran moi ben e semella que nos entenden pouco. O tempo vainos dar a razón e pasaremos a ser a minoría escoitada e solicitada. E aí estaremos para axudar a quen o precise.

more about “Congreso Nacional Internet en el Aula“, posted with vodpod

A nosa web dinámica

Lembro a todo o profesorado do CPI que a web dinámica é un espazo colaborativo onde, ademais dos departamentos e ciclos, cada profesora e cada profesor pode dispoñer da súa propia páxina. Como exemplo está a miña, pero non debera ser a única. Esta web só se poderá considerar dinámica se hai contidos aportados por todas e todos. Animádevos e participade. Se tedes dúbidas ou queredes engadir algo escribídeme ao meu correo da Xunta.

Fin de curso

—– Mensaxe orixinal —– De:  Consellería de Educación e Ordenación Universitaria <conselleria@edu.xunta.es> Data: Venres, Xuño 20, 2008 11:46 am Asunto: Remate curso 2007_2008 > Santiago de Compostela, 20 de xuño de 2008 > > Un ano máis, ás portas das vacacións do verán, a Consellería de > Educación e Ordenación Universitaria agradece o esforzo e > entusiasmo de toda a comunidade educativa durante o curso que agora > remata. > Este agradecemento diríxese, dunha maneira especial, ao > profesorado. A sociedade en xeral, e esta Consellería en > particular, ten posta a súa confianza nel, na seguridade de que o > seu traballo profesional está sendo decisivo para alcanzar os > obxectivos marcados pola LOE e mellorar, en consecuencia, a > calidade da educación.

A miña resposta:

Somos moitas e moitos as profesoras e os profesores que estamos a agardar un pulo importante da Consellería para incorporarmos as TIC no ensino en Galicia. Necesitamos máis medios e formación, ordenadores nas aulas e coordinadoras e coordinadores TIC en todos os centros con horario suficiente para levar a bo término esta incorporación, equiparándonos a outras Comunidades Autónomas que van moi por diante do noso escaso progreso. Agradezo que se recoñeza a profesionalidade e o esforzo, pero de pouco vai servir isto se non contamos cun plan de incorporación das TIC comprometido e con suficiente apoio da Consellería. O meu blogue de aula http://tic56.wordpress.com, o blogue de coordinación das TIC http://ticblog.wordpress.com, a web dinámica http://centros.edu.xunta.es/cuntiscpi/, o wiki do profesorado http://donaurelio.wikispaces.com/, e un número considerable de blogues do profesorado e alumnado do CPI Don Aurelio de Cuntis, xurdidos todos ao longo deste curso teñen moi difícil a súa aplicación e aproveitamento nas aulas por non contarmos con ordenadores nelas que nos posibiliten a aplicación das TIC, o cal está a redundar nun desencanto da comunidade educativa que ve nestes esforzos unha moi insuficiente correspondencia coa súa necesaria aplicabilidade. Estes obxectivos están contemplados na LOE e son unha parte fundamental da calidade da educación. Agardo que o curso que vén non volva ser un novo curso de retraso na incorporación das TIC ao ensino en Galicia.

José Alberto Armada Rodríguez

Polo recoñecemento oficial das publicacións na rede

Moitas e moitos docentes, cada día máis, ocupamos un sinfín de horas en publicar na rede os nosos espazos educativos para beneficio de toda a comunidade. Este traballo, lonxe de obter recoñecemento por parte das administracións educativas, mesmo resulta ser totalmente desperdiciado polas administracións dalgunhas comunidades (Galicia, por exemplo). Todo o contrario ocorre en Aragón onde os blogues e publicacións na rede do profesorado insírense nun portal educativo para estímulo e beneficio de todos. E todo o profesorado que traballa na rede sabe do escasísimo custe que supón para a administración o mantemento dun portal deste tipo. A Consellería de Educación xa ten un portal educativo. Pódese comparar ollando o apartado de recursos ou o de recursos educativos. Tamén convén mergullarse no apartado de materiais para a aula ou os recursos educativos en liña onde atoparemos algúns dos que están neste blog dende fai moito máis tempo que no portal de Siega e que son doutras comunidades autónomas. ¿Desinterese administrativo? ¿Falta de persoal dedicado a recoller os excelentes recursos do profesorado galego (un exemplo)? Dende logo non poden dicir que non hai suxestións. Eu fixen un par delas hai meses e nin sequera me contestaron. ¿Alguén quere probar? Na rede social “Internet en el aula” proponse unha mobilización do profesorado para reclamar recoñecemento polo seu traballo e dedicación.

Recursos en ticblog

TIC no ensino galego

O sistema educativo no estado español está a atravesar unha preocupante etapa de “diversificación” no que respecta aos medios educativos cos que conta o profesorado para desenvolver o seu traballo e o alumnado para a súa formación e aprendizaxe. Sabemos que estamos inmersos na sociedade da información e do coñecemento. E sabemos que o alumnado de hoxe vai desenvolver a súa vida nuns ámbitos socio-laborais nos que a utilización e o control dos recursos que dan acceso á información e á comunicación, é dicir, as TIC (Tecnoloxías da Información e a Comunicación) serán fundamentais, non xa para o éxito senón para a vida en xeral. Resulta, polo tanto, imprescindible que o sistema educativo dea resposta a esas necesidades formativas en TIC e con TIC. E isto é o que en maior ou menor grao están a promover algunhas autonomías dentro do estado. O grao de incorporación das TIC no ensino en Galicia é moi deficiente. A escaseza de recursos, equipos informáticos e formación do profesorado é substancialmente inferior á doutras comunidades. Por exemplo:

Centros TIC
Galicia: 20
País Vasco: 120
Primeiros centros TIC
Galicia: fai dous anos.
Asturias: 8 anos.
Nomeamento das coordinadoras e dos coordinadores TIC
Galicia: indeterminado, “poderanse nomear”.
Andalucía: na maioría dos centros.
Horario das coordinadoras e dos coordinadores TIC
Galicia: indeterminado, practicamente inexistente.
País Vasco: 12-13 horas semanais.
Soporte e mantemento de equipamentos informáticos
Galicia: Dependemos da Unidade de Atención a Centros, ou sexa, indeterminado.
Estremadura: administradora/administrador de rede a tempo completo en cada centro.
Formación de coordinadoras/es TIC e profesorado
Galicia: escasísima.
Andalucía: moita formación TIC para o profesorado en xeral.
Portais educativos
Galicia: poucos recursos propios, enlaces ós portais doutras comunidades autónomas, non hai coordinación do traballo do profesorado (blogs, wikis…).
Aragón: apoio practicamente ilimitado a todo o profesorado, directorios de blogs, wikis, recursos propios…
Dotación de medios TIC nos centros
Galicia: moi escasa, baseada en aulas de informática (unha sesión semanal de promedio por cada grupo), practicamente sen aulas TIC.
Aragón: un ordenador para cada alumna/o de 3º Ciclo de Primaria.

Estremadura: un ordenador por cada dúas/dous alumnas/alumnos.
Medios a disposición do profesorado
Galicia: ningún.
Castela-A Mancha: a partir de setembro un portátil para cada profesora/profesor.

Nesta situación tan desfavorable para a educación en Galicia, só cabe agardar que a sociedade faga as oportunas reclamacións. Expoño algunhas que considero necesarias:

1.- Facilitar e impulsar a formación en TIC a todo o profesorado galego.

-Deberá aumentarse a oferta de cursos TIC por parte da administración.

-Deberán dispoñer de, alomenos, unha hora semanal para recibir asesoramento e formación básica da/do coordinadora/coordinador TIC.

-Redución de horario lectivo para o profesorado implicado máis directa e activamente na integración das TIC no centro.

2.- Equipamientos informáticos mínimos:

-Un ordenador por cada dúas/dous alumnas/alumnos en Infantil e 1º e 2º ciclos de Primaria.

-Un tablet-pc para cada alumna/alumno a partir do 3º ciclo de Primaria.

-Conexión de banda ancha e wifi de calidade en todo o centro.

-Un ordenador e un proxector en cada aula.

-Dotar a cada profesor/a dun ordenador portátil para o seu traballo diario.

3.- Establecer a figura da/do coordinadora/coordinador TIC coas seguintes características:

-Ser un cargo remunerado, como o de calquera departamento de ESO.

-Recibir formación e coordinación suficiente por parte da administración.

-Centrarse na asesoría e o apoio na formación básica do profesorado do centro para que incorporen as TIC nas súas aulas.

-O horario deberá estar en proporción ao número de profesoras/es do centro. Non debería ser inferior a 20 minutos semanais por cada profesora/profesor, ou sexa, un número de horas que resulte de dividir entre 3 o número de membros do claustro..

-O mantemento dos equipos deberá estar a cargo da administración, con persoal contratado para esa función ou pagando a una empresa que o xestione.

4.- Impulsar a produción de recursos educativos con TIC en lingua galega.

¿Queremos TIC no ensino galego?

Rede social do profesorado galego

Á vista da “especial” situación de precariedade de medios para incorporar as TIC no ensino en Galicia, invito a todo o profesorado galego a participar na rede social “Ágora rede” que é unha “rede aberta a todo o profesorado que aposte pola cultura do intercambio para a innovación e a mellora da práctica docente, polo traballo colaborativo coas TIC e polo labor de difusión de experiencias, materiais, ferramentas e recursos didácticos“.
Actualmente somos 36 membros, así que cómpre sumar esforzos para facela máis efectiva de cara á nosa propia formación e tamén para establecer unha posición dende a que demandar o que precisamos para traballar nas nosas aulas.