Rede Centros TIC Galicia

Polo que son quen de observar existe unha web dedicada aos centros educativos galegos que teñen a consideración de Centros TIC.

Entre eses centros, moi poucos para o alarmante atraso que sofre a educación en Galicia no que se refire ás TIC e todo o que conlevan para o futuro do alumnado e do profesorado, non está o CPI de Cuntis no que exerzo como coordinador TIC sen horario suficiente (dúas sesións semanais de 50 minutos), nin apoio e moito menos recoñecemento ningún por parte da administración educativa galega en relación co traballo e o esforzo que estou a realizar nos últimos 15 meses.

Envieilles os enderezos deste blogue de coordinación e do que utilizo para as miñas clases no 3º Ciclo de Primaria.

Hoxe sae publicada na referida web o meu blogue de Recursos TIC no 3º Ciclo de Primaria.

Pois xa eran horas de que, aínda sen horarios nin apoios, se estean a espallar as publicacións de quen temos algo que ofrecer para contribuír a mellorar o ensino en Galicia.

O meu agradecemento á persoa responsable da administración da web.

Galicia, na cola de Europa en TIC

Hoxe leo en “El Correo Gallego” que Galicia, xunto con Estremadura, está na cola de Europa no uso de Internet.

“El bajo nivel educativo y económico aleja a estas comunidades de su integración en la sociedad de la información ·· Son las conclusiones a las que llega un estudio de la Universidad Rey Juan Carlos”

Sinálase neste estudo que “existe una importante brecha digital entre comunidades autónomas“. E que “esta brecha sitúa a Extremadura y Galicia a la cola y a gran distancia de asumir los rasgos propios de una sociedad de la información“.

Pódese ler a noticia completa.

Bueno, nada novo e nada sorprendente nos resultados. Polo menos, para min. Só unha apreciación: mentres que en Estremadura teñen un ordenador por cada 2 alumnas/os nas aulas dos centros educativos, aquí en Galicia resulta moi raro atopar tan só un ordenador en calquera aula. Mentres que en Estremadura dispoñen de unha/un administradora/administrador de rede en cada centro con horario completo, aquí en Galicia non temos en ningún centro persoal asignado para que a rede e os ordenadores estean “atendidos” e funcionen correctamente. Mentres que en Estremadura existe a figura da/do coordinadora/coordinador TIC con recoñecemento oficial e horario suficiente para realizar o seu traballo de asesoramento e impulso para a integración das TIC nas aulas, aquí en Galicia non existe nin tal recoñecemento nin tal horario fóra de 20 centros “piloto” que para o vindeiro curso aumentarán na nada desprezable cifra de 10 máis. E así sucesivamente… do mesmo xeito que existe unha fenda dixital que se está a agrandar tódolos anos, tamén é constatable que algunhas comunidades (Estremadura, xa citada, pero tamén Castela-A Mancha e outras) están a poñer medios a disposición do ensino para que dentro dun tempo o estatus de sociedades pouco desenvolvidas no ámbito das TIC mude dun xeito apreciable e poidan saír desa cola española e europea. Aquí en Galicia non se está a favorecer nin con medios, nin con persoal, nin con apoios a incorporación das TIC ao ensino. Xa o vimos dicindo dende hai tempo: estamos a percorrer o camiño axeitado para chegarmos a ser sociedade máis atrasada no mundo da información e a comunicación. Seguramente esta xeración de estudantes de Galicia deberá o día de mañá complementar a súa formación (quizais en Estremadura) para aprender algo do que se precisa para obter unha cualificación que lles permita optar a postos de traballo propios da sociedade da que nos estamos a alonxar.

Xeografía de Galicia

Aragón TIC

A noticia sitúa a Aragón coma referente mundial no uso das TIC en educación. Sorpréndeme, pero non tanto. Xa o comentei en diversas ocasións: aí estase a apostar forte polas TIC. A propaganda de Gates non me interesa. Máis ben estou do lado d@s que pensan que sen portas (gates) nin ventás (windows) aforramos cartos. Pero o que me chama poderosamente a atención é o parágrafo no que se comenta textualmente:

“Mientras tanto, otros seis gobiernos regionales en España también han comenzado a introducir programas similares en sus escuelas locales. En el evento, que arrancó ayer en la capital alemana, estaban algunos de ellos: consejeros procedentes de Castilla-La Mancha, Castilla y León, Cataluña, Galicia y Madrid, junto a la canciller alemana, Angela Merkel, que participó como anfitriona”.

¿Seguiremos o exemplo dos avantaxados? ¿Chegará o día? Oxalá.

Ler a noticia completa… 

 

Galicia é noticia

Unha vez máis leo na prensa diaria que Galicia volve ser noticia, tecnoloxicamente falando, por estar á cola en número de usuarios de internet (¿para quen estarei a escribir?): só un 33% da poboación. E saliéntase que estamos por detrás de todas as comunidades autónomas agás Extremadura (30%). ¿Un éxito? As contas son doadas de facer: Extremadura ten a maior ratio de ordenadores por alumn@ nas súas aulas de todo o estado. ¿Onde estamos? ¿A onde imos por este camiño? Sen usuarios de internet nas casas e nas escolas de Galicia, ¿cal é o noso futuro? ¿Que fan as nosas autoridades educativas? ¿Invístese en educación en Galicia? ¿Que tipo de educación? ¿Fórmase ó profesorado en Galicia? ¿Que tipo de formación? @s docentes galeg@s temos unha formación en tecnoloxías da información e a comunicación aplicadas ó ensino practicamente nula. Só unha porcentaxe baixísima do profesorado galego, por méritos propios baseados no seu interese autoformativo, pode hoxe en día estar en disposición de impartir a docencia aplicando as novas tecnoloxías da información e a comunicación. E inda así, dada a escasísima proporción de ordenadores por alumn@, limitada a un aula de informática con 15 ordenadores (no meu centro) para 15 aulas de Infantil e Primaria e outra con 16 ordenadores para 8 aulas de ESO, e unha pizarra dixital para todo o colexio, ¿quen con coñecementos suficientes podería aplicalos? ¿Onde e cando? O profesorado, por activa ou por pasiva, bota contas do que ten diante e o resultado maioritario é: desinterese.

Non todo deben ser preguntas, así que deixarei algunha resposta, a título persoal:

• A Consellería de Educación debería impartir cursos TIC, obrigatorios, a todo o profesorado galego dentro do horario lectivo.
• Nos colexios debería haber un ordenador en cada aula por cada 2 alumn@s.
• Cada aula debería contar cunha pizarra dixital interactiva, pero cando menos deberiamos ter cinco en todo o centro (unha para Infantil, dúas para Primaria e dúas para Secundaria).
• En cada centro debería haber alomenos un/unha coordinador/a TIC con suficientes horas dentro do seu horario lectivo para realizar as súas funcións. Algunhas comunidades autónomas estableceron ata 8 semanais (eu dispoño de dúas) nun centro cun número de profesores/as de entre 40 e 50 (no noso caso somos 46), como punto de partida para posteriormente ilas aumentando quizais ata a totalidade do seu horario lectivo.
• Cada profesor/a debería dispoñer dun ordenador portátil para o seu traballo diario. Que sexa material do centro, coma os libros de texto que manexamos, pero a disposición do profesorado, porque pouc@s dispoñen de ordenador nas súas casas, menos de conexión a internet, e moit@s menos de tempo suficiente para preparar as clases con TIC e de TIC dende casa e logo levar eses traballos ó colexio, trasladalos ós ordenadores do centro e aplicalos ás clases.

Son consciente de que o investimento para chegarmos a estes niveis é elevado. Pero penso que necesitamos un Plan Galicia Educativo. Procúrense axudas da Unión Europea, compensacións do estado español que reduzan as desigualdades, fágase política educativa de alto nivel e cun compromiso claro de acadar resultados válidos para achegármonos ás concrecións que esixe a realidade educativa actual. Fágase algo máis que escoller uns poucos colexios para desenvolver as TIC. Os demais, a maioría, tamén existimos. De momento…