Leo na prensa que a Consellería de Educación está a distribuir 9.000 equipos informáticos nos centros galegos (algo nos chegará). Mágoa que non distribúan un tablet pc para cada alumn@ coma en Aragón (no 3º Ciclo de Primaria, para empezar). Ben, estamos en plena campaña electoral, así que o que habían distribuir hai uns meses fano agora. Moi conveniente. E benvidos sexan estes recursos materiais, que dos persoais non se albisca nada. E cando pasen as eleccións, xa vos imaxinades…
Ben, tralo comentario da noticia, quero reflexionar sobre a utilización dos recursos, sempre materiais que en cuestión de persoal nunca estivemos peor (alomenos en Infantil e Primaria). Pois ben, considero que os recursos informáticos do centro deben estar á disposición de quen os utiliza. E cando digo a disposición refírome a unha disposición practicamente permanente. Poñamos un exemplo: dende hai un par de semanas dispoño na miña aula dun portátil e un proxector cunha dobre intención. Por unha banda, aplicar os recursos TIC co meu alumnado sen termos que andar a pasear polas aulas de informática e do encerado dixital en horas fixas e escasas (que tamén imos) dispoñendo en calquera momento do día de recursos para complementar o ensino baseado (polo momento) nos libros de texto. Véxase un exemplo. Mesmo a lectura do plan lector facémola con recursos TIC. Por outra banda, ó dispoñer destes medios materiais asegúrome a posiblidade práctica e frecuente de testear eses recursos que publico e organizo, xa que sen unha aplicación “in situ” resulta imposible determinar a súa idoneidade. Ata aquí este exemplo xustificativo.
A respecto do dito, considero que hai vari@s profesores/as no centro que deberían ter acceso permanente a este tipo de recursos, xa que demostran ter un traballo planificado de incorporación das TIC nas súas clases.
Aberto o debate.
Agora, coa nova chegada de material, correspóndelle ó Departamento TIC (unha das páxinas da cabeceira deste blog protexida por contrasinal coma algunhas outras para que só quen a saiba poida acceder ó seu contido, ata o de agora só o noso director a coñece porque ninguén máis se interesou por ela) decidir sobre repartos, ubicacións, utilización, etc. do mesmo.
Entendo, á espera das decisións do Departamento, que se lles dará prioridade a tod@s aqueles/as que estean interesad@s nas TIC. Daquela, como este interese debe concordar bastante co que se ten nos blogs e wiki do colexio, agardo que os comentarios d@s interesad@s non se demoren e propoñades algunhas solucións ás vosas necesidades.
En resume, e sempre dende a miña opinión (que non é nin moito menos a única a ter en conta), os recursos TIC débense facilitar ó máximo para aqueles/as profesores/as que estean dispost@s a utilizalos cunha maior frecuencia, en detrimento d@s que só farían un uso ocasional dos mesmos.
Pois logo…
Aula Virtual TIC-PEMEs” que ofrece cursos e recursos. Non se pode pasar por alto. Xa estamos a ver que quen non se forma é porque non quere. Ademais ten blog, wiki, etc. Do máis interesante.
